Close message
Skip to content

Te Tiriti o Waitangi — E Iwa Ngā Oranga

Embedded content: https://www.youtube.com/watch?v=GMYYp4LhY9s

Tētahi o ngā kōrero maha mō te Tiriti o Waitangi. Nau mai ki He Tohu kia kite me te rongo kōrero anō mō tēnei.


Transcript

Whakaahua

He tuhinga o te whakaahua o tētahi ngeru mangu, mā, kiwikiwi anō hoki e pekepeke ana i te pātītī i mua i ētahi whare rākau āhua kōkau me ngā whakairinga kākahu.

Oro

E kī ana te kōrero, e iwa ngā oranga o te ngeru. Ko taua rite anō pea mō Te Tiriti o Waitangi.


Whakaahua

Kua rewa te waewae o mua, ka titiro te ngeru ki te kūaha rākau o mua o tētahi whare. Kei roto, e takoto ana tētahi tāne i runga i tētahi moenga, kua ūhia ia ki te paraikete.

Oro

Kei te tiriti o Kuīni, kotahi mano waru rau whā tekau ma rua te tau, kei te puku o Tāmaki-makau-rau.


Whakaahua

E rua ngā pūtu e noho ana i te taha o te moenga o te tāne kei te taha o tētahi whata me tētahi ahi rino.

Oro

E moe ana te kaitiaki tuhinga, a George Elliott i tōna whare, kātahi ia ka whakaohohia e te tioro me te horu a te tangata e titi mai ana, pēnei i te tākiri o te ata.

Ka konihi te auahi i raro i tōna tatau, ka whakatata atu ki a ia…


Whakaahua

Ka noho tū a George me tana pāhau, ā, ka kuhu ia i ōna pūtu.

Oro

Mate ana i te maremare, rewha ana ngā karu i te auahi, ka hurori ngā wae, ka huaki i te tatau. Anana! E kai ana te ahi i te tāone. E haka haere ana ngā uri o Mahuika i ngā kāinga, ā, pau tonu atu ētahi o ngā whare i te ahi.


Whakaahua

Ka kainga ngā whare e te mura o te ahi, ka tae hoki te ahi ki ngā kōrere me ngā tuanui o ngā whare kei taua tiriti tonu, kei reira ētahi e pūponga ana.

Oro

Te Tiriti!


Whakaahua

Ka tū a George i waenganui o te tiriti, e tuwhera ana ōna karu, ko tōna ringa kei tōna kanohi.

Oro

Ka uhi a George i tōna kanohi ki te kahu, ka rere ki roto i te tari e kainga ana e te ahi, kei reira te Tiriti, ka kimi, ka rapa kei hea rā.


Whakaahua

Turakina ana te kūaha, ka ārai a George i tōna upoko, kātahi ia ka tīkape i ngā pūkei pepa kua tuhia ki te ringaringa kia kitea ai tētahi tākai nunui e tanumia ana i raro iho.

Oro

Arā!

Ka mau ngā tākai i ōna ringa, ka oma ia ki te tatau.


Whakaahua

Ka oma atu a George i te whare rua-papa e ngiha ana.

Oro

Kātahi ka tanuku te whare.

Ka hurori ngā wae o George, ka kihakiha te manawa, engari e mau tonu ana te Tiriti i ōna ringa.


Whakaahua

Kua tūturi iho a George, kātahi ia ka takoto i waenganui o te tiriti. Ka mātakitaki te ngeru i a ia nōna e hipa atu ana.

Oro

Koinei tētahi o ngā tini kōrero mō Te Tiriti o Waitangi. Haere mai ki He Tohu ki te ako i ngā kōrero mō tana putanga i te ahi, i te waha o te kiore me te pakanga.


Whakaahua

Ka puta mai te tohu waituhi kārikiōrangi, karaka, waiporoporo o He Tohu. He whakaputanga, he tiriti, he petihana. Tohumarau He Tohu. Te Puna Mātauranga o Aotearoa, Te Whanganui-a-Tara. (Kāore ētahi tuhinga whai tikanga ā-motu i tūkinotia i te hanganga o tēnei pakiwaituhi tāoreore.) Ka puta mai te tohu o te Kāwanatanga o Aotearoa.


Ngā whakamihi

He mea hanga i te taha o Te Tari Taiwhenua.

Ariā auaha — Ogilvy New Zealand

Pakiwaituhi tāoreore — YukFoo

Reo — Kirk Torrance

Puoro — Al Fraser and Ariana Tikao

Any errors with the transcript, let us know and we'll fix them digital-services@dia.govt.nz