Me whakauru mai koe ki te whakataetae tuhituhi o Smart Alex mō ngā ākonga kura tuarua

Enter the Smart Alex creative writing competition for secondary school students gives the English version of this blog post.

Kei te hiahia ō ākonga kura tuarua kia whai wāhi rātou ki tētahi whakataetae tuhituhi whakaoho i ngā whakaaro, kia wini moni hoki?

Kua whakarewaina e te rōpū o ngā Friends of the Turnbull Library (FoTL) tētahi whakataetae mā ngā ākonga kura tuarua katoa o Aotearoa me te Moana-nui-a-Kiwa.

Kāore he utu mō te whakauru mai, ā, neke atu i te $2,000 ngā moni paraihe. Ko te whāinga he whakanui i te rau tau o Alexander Turnull, he whakanui hoki i tāna i waiho iho ai ki te ao.

Poster for Smart Alex creative writing competition for secondary school students

Ko wai rawa a Alex, he aha i kīa ai ia he ihumanea?

Tērā tētahi tangata i noho i Aotearoa New Zealand 100 tau ki muri, he tau te taha, he huatau ngā whakaaro, tōna ingoa ko Alexander Turnbull — te ingoa o tōna whānau mōna ko Alex — he rawe ki a ia te kohikohi taonga: Ko ngā toi tērā, ko ngā taputapu tawhito tērā nō tua whakarere, ko ngā kākahu tērā, ko ngā moni tērā, ko ngā mahere tērā, ko ngā whakaahua tērā, me ngā pukapuka – otirā ko ngā pukapuka mō Aotearoa me te Moana-nui-a-Kiwa tōna kaingākau. Otirā i hokona e ia tana pukapuka tuatahi 17 tau tōna pakeke, ā, kāore he mutunga o tāna mahi. Ehara i te mea he tangata tūmatarau ki te pukapuka, he kaiaruaru kē ia i te pukapuka, ā, nā tana kaingākau ki tēnei mea te pukapuka i hua ake ai tētahi taonga whakamīharo.

I tōna matenga, ka takohatia e Alexander Turnbull tāna kohinga katoa (tae atu ki ngā pukapuka 55,000!) ki Aotearoa. Ka noho taua takoha hei pūtake mō te whare pukapuka nui rawa o ngā tuhinga i Aotearoa katoa, e kīa nei ko te Whare Pukapuka o Alexander Turnbull (ATL). I kīa tāna i takoha ai “te tino takoha ngākau marere taonga nui ki te hunga o Aotearoa e tētahi tangata nō Aotearoa, mai rā anō” (New Zealand Times Hūrae 1918).

Nā te takoha a Alex ki a tātou 100 tau ki muri, kua tino mōhio ngā tāngata o Aotearoa mō ngā rā o mua o tō rātou whenua.

Te whakataetae

E ākina ana ngā ākonga kia tuhi i tētahi tuhinga auaha ahurei, e urupare whaiaro ai rātou, e whakamārama ai rānei i tētahi taonga i roto i ngā kohinga o te Whare Pukapuka o Alexander Turnbull.

Ka āhei ngā tuhinga reo kōrero paki, reo ruriruri, tētahi huinga rānei o ngā tuhinga me ngā whakaahua pēnei i te tāhei pakiwaituhi, tētahi paki ā-pikitia rānei, te tuku mai.

He akiaki tuhinga auaha

Hei āwhina i ngā ō tuhi auaha, kua kohia e mātou tētahi huinga taonga whakaoho hinengaro mai i ngā kohinga o te Turnbull. Tō mātou hiahia kia whakaohongia te mauri tuhituhi i roto i ngā ākonga kia puta ai he tuhinga ki te ao.

Tētahi, ka āhei koe ki te rapu tuihono me kore e kitea tētahi mea whakaoho i a koe i roto i ngā kohinga.

Mō ētahi atu mōhiotanga mō Alexander Turnbull me tana kohinga, tirohia tana haurongo i roto i:

Ngā taipitopito mō te whakauru

E wātea ana te whakataetae ki ngā tāngata katoa kei tētahi kura tuarua i Aotearoa, i te Moana-nui-a-Kiwa rānei. Kei roto hoki ngā ākonga kura tuarua e ākona ana i te kāinga.

  • Mō ngā tau Years 9–10, kei te 250 kupu te tepenga, tae atu rānei ki ngā whārangi A4 e 3 me he pikitia kei roto. Ka whiwhi te tangata toa i tētahi $500, ka whiwhi te tuarua i te $200. Ka whiwhi hoki te whare pukapuka o te kura o te tangata toa i tētahi pepa hoko pukapuka mō te $150.
  • Mō ngā tau Years 11–13, kei te 500 kupu te tepenga, tae atu rānei ki ngā whārangi A4 e 6 me he pikitia kei roto. Ka whiwhi te tangata toa i tētahi $1000, ka whiwhi te tuarua i te $300. Ka whiwhi hoki te whare pukapuka o te kura o te tangata toa i tētahi pepa hoko pukapuka mō te $150.

Me mātua tae mai ngā tono whakauru i mua i te 5 karaka i te ahiahi hei te 22 Hūrae 2018.

Ka whakapuakina ngā toa me ngā whakaurunga e tino whakamihangia ana hei te Paraire 14 Hepetema 2018 (koirā hoki te huritau 150 o te whānautanga o Alexander Turnbull).

Me mātua whakapiri ngā whakaurunga katoa ki te puka whakauru whai mana (hei pdf, hei tāpiritanga Word rānei), ka kitea taua puka whakauru ki te pae tukutuku o ngā Friends of the Turnbull Library (e kitea ai hoki e koe ētahi atu kōrero mō te whakataetae).

Me tīmata ki te waihanga

Ko te tikanga o tēnei mea te tuhi auaha he whakatakoto whakapuaki pakari tonu i te tīmatanga, me te karanga i ngā pohewatanga kia rērere i muri. E taea ai tēnei mā te hauhake mā te hoki ki ngā maharatanga whaiaro, ki ngā kare ā-roto, ki ngā whakaahua, otirā ki te puoro tonu, ēnei katoa he tino huarahi whakahihiko i ngā mahi tuhi kōrero paki.

He rawe hoki ngā maharatanga me ngā tohutohu a Frank McCourt mō tāna 'whakaako' i te tuhituhi auaha ki ngā ākonga kura tuarua mō te 15 tau, kei te mau tonu te pai o ana kōrero, rite tonu ki te tau i tuhia ai e ia i te tau 2002.

Kumea mai te taura, katia te hiko, waiho ngā pūhiko kia matemate. E noho i konā ki te moemoeā. Ki te rangirua koe, me kōrero koe i tētahi paki.

Ētahi atu huarahi whakahihiko i ō ākonga

Anei ētahi atu huarahi i tahuri ai ētahi kaiako, kaituhi hoki ki te whakaoho i ngā hinengaro o ā rātou ākonga ki te tuhituhi.

Creative writing in the classroom: Five top tips for teachers — he tino kupu tohutohu ēnei mai i te kaiako reo Ingarihi i a Alan Gillespie

Drawing words & writing pictures — e tāpaetia ana i konei ētahi ngohe whānui tonu, he akoranga tohutohu, he kupu tohutohu, me ētahi mahere akoranga mō te ako, te tuhi me te hoatu whakaahua ki ngā pakiwaituhi

How to win a creative writing competition — top tips — he tohutohu nā Joe Craig ki ngā kaituhi taiohi kia mōhio rātou ki te karo i ngā tāpokopokotanga ka tūponotia e te tini, me pēhea hoki te whātaretare ki runga rawa kia rangona tō reo i roto i te whakaminenga.

See think wonder — tētehi huarahi poto hei whakaoho hei hono i ngā ākonga ki tētahi mea whakamere.

Tips for illustrating your story (pdf, 294 KB) — i ahu mai ēnei akiaki whakaahua i te kaituhi, ētita pukapuka tamariki hoki nō Aotearoa, i a Don Long.

Top tips for writing your story (pdf, 290 KB) — i ahu mai ēnei akiaki whakaahua i te kaituhi, ētita pukapuka tamariki hoki nō Aotearoa, i a Don Long.

20 top tips to make creative writing class great — tētahi rerenga tohutohu tuhinga auaha whai tikanga rawa, mai i te waiho i ngā ākonga ki te kimi i ō rātou ake moemoeā ki te ako i a rātou me pēhea te tuhi mō ngā pāhapori.

Writing prompts — ka tiria e tētahi kaiako, e Luke āna akinga tuhi o ia rā ki tana akomanga. Kei roto hoki tētahi pātene akiaki pokerehū.

Ko te pānui pukapuka tētahi o ngā tino huarahi hei ako me pēhea te tuhi

Tuatahi, kōwhiria ētahi paki mai i ētahi kaituhi tino ngahau ki a koe, ka pānui anō ai me te arotahi ki te whakawhanake kiripuaki a te kaituhi, me tāna whakaahua i te wairua me te kare ā-roto. Kei Booktrust tōna whānuitanga o ngā akiaki tips for teenage writers me ētahi rārangi pukapuka mō ngā pakeke katoa.

Kei te tino hīkaka mātou ki te pānui i ngā paki a ō ākonga

Ahakoa kāore he mutunga o ngā tohutohu mō te tuhi auaha, tēnei a Smart Alex te kimi nei i te tini o ngā paki hei whakaahua i te mīharo, i te pākiki, i te whāinga whakaaro, i te whakahangareka, i te māia, me te ihumanea o te tuhi auaha.

Kei te kaikā mātou kia kite ka pēhea te hanga hou o ngā hinengaro taiohi i ō tātou rā o nanahi, o naianei, me ngā rā kei te tū mai mā te whakamahi i ngā kohinga Turnbull!



Nā Piripi Walker i whakamāori.

By Dylan Owen

Dylan is an Online Content Services and Products Developer (Curriculum) with National Library's Services to Schools.

Post a Comment

(will not be published) * indicates required field

Be the first to comment.